لكل شعب عاداته وتقاليده وأفكاره.. منها اللي صح ومنها اللي غلط.. وفي مصر ارتبط  لبن السرسوب بحاجتين.. الأولى خرافة بنسبة  100%.. وهي إن الأم لازم توقع حبة من لبن السرسوب على الأرض علشان تبعد الحسد والعين عن بيتها وعن طفلها.

أما الحاجة التانية فأكدها العلم بنسبة 100% وهي إن لبن السرسوب بيقوي الجهاز المناعي للطفل ويضمن له حياة صحية.

وهو ده بالظبط اللي قالته منظمة الصحة العالمية ومنظمة الأمم المتحدة للطفولة في تقرير مشترك أكدوا فيه إن "لبن السرسوب بيحمي الطفل من خطر الموت المبكر".

التقرير اعتمد على معلومات خاصة بـ76 دول.. ووضح إن الحليب اللي بيفرزه ثدي الأم بعد الرضاعة مباشرة، واللي بيعرف شعبيا باسم لبن السرسوب وبتنتجه الغدد الثديية في أواخر الحمل، غني بالبروتينات زي "بروتين اللاكتوفيرين".. وغني كمان بوالأجسام المضادة من نوع "الجلوبولين المناعي" واللي بتحمي الطفل من الأمراض وبتعتبر "أول لقاح للطفل" بعد الولادة.

التقرير كشف ان رضاعة لبن الرسوب بتساعد على خلق حالة تفاعلية بين الأم والطفل بسبب التلامس الجلدي السريع بين الاتنين؛ وكمان بينظم درجة حرارة جسم الطفل الرضيع وبيساعد جسم الأم على إطلاق هرمون "البرولاكتين" اللي بيحفز إنتاج الحليب وبالتالي بيضمن للطفل الحصول على غذاء مستمر.

وقال التقرير ان الأطفال حديثي الولادة اللي بدأوا الرضاعة بين ساعتين و23 ساعة بعد ولادتهم ارتفع عندهم خطر التعرض للوفاة المبكرة بنسبة 33% مقارنة باللي بدأوا الرضاعة الطبيعية خلال ساعة واحدة من الولادة؛ أما اللي تأخروا في الرضاعة لأكتر من يوم فارتفعت نسبة تعرضهم لخطر الموت المبكر لأكتر من الضعف.

التقرير حذر من ان 78 مليون طفل –يعني 3 من بين كل 5 أطفال حول العالم- معظمهم في البلدان الفقيرة- بيتحرموا من لبن السرسوب لأسباب كتيرة أهمها ارتفاع معدلات الولادة القيصرية واللي بتبعد الطفل عن أمه على الأقل في الساعة الأولى من ولادته.

التقرير أشار إلى ان معدلات الولادة القيصرية ارتفعت في مصر –على سبيل المثال- من 20% عام 2005 إلى 52% في عام 2014.

وأوصى التقرير الحكومات بضرورة البحث عن سياسات وبرامج صحية تحمي حق الطفل في رضاعة لبن السرسوب في الساعة الأولى من ميلاده.